top of page
الفتق السري عند الأطفال
وحديثي الولاده
اللهم أشفي كل أطفالنا شفاءاً لا يغادر سقماً
الفتق السري هو أحد أشهر العيوب الخلقيه اللي بيصاب بيها نسبة كبيره من الأطفال حديثي الولاده .
طيب اي هو تعريف الفتق السري :
عباره عن إنتفاخ بيظهر علي شكل بلونه صغيره في منطقه السره عند الطفل .
طيب اي هي أسباب الفتق السري ؟
أولا في الطبيعي عند اي طفل جدار البطن بتاعه بيتكون من 3 طبقات وهما:
الجلد ثم عضلات البطن وبعدين تجويف البطن
ف ممكن يبقي فيه جزء من طبقات البطن دي لسه لم يتم تكوينه , فلما الطفل يقوم بأي حركه أو نشاط او حتي يكح , بيخرج جزء من الأمعاء في المنطقه الفاضيه دي , ودا اللي بيسبب الإنتفاخ او البلونه اللي بتظهر في منطقه السره عند الطفل .
طيب أمتي اعمل عمليه الفتق السري ؟
الحقيقه أن الفتق السري مش بيتعمل ليه أي عمليات في الأول سواء عند الذكور أو الإناث حديثي الولاده , ودا لأن زي ما قلنا مع الوقت وكل ما الطفل بيكبر عضلات البطن بترجع تلم تاني , ويختفي الفتق من غير اي تدخل جراحي , علشان كدا الدكتور ممكن يستني 3 أو 4 سنين لأن ممكن الفتق يختفي لوحده وفي الغالب دا اللي بيحصل .
طيب هل الفتق السري ليه مخاطر؟
الحقيقة أن الفتق السري ملوش أي مخاطر , كمان نادراً جداً أن الأمعاء دي يحصل ليها أي اختناق زي الفتق الإربي ودي فرصه كبيره جداً أن الطفل ممكن ميحتجش أي عمليه , طب لي بقي؟؟
لأن مع الوقت المنطقه المفتوحه في جدار البطن دي بتبدأ تلم تاني وتقفل , وبترجع أمعاء الطفل لمكناها الطبيعي داخل تجويف البطن .
طيب عملية الفتق السري بتبقي عامله ازاي ؟؟
عملية الفتق السري بتبقي عملية تجميليه , بمعني أن الدكتور بيفتح فتحه صغيره فوق سره الطفل , والفتحه دي بتاخد شكل الإنحناء بتاع السره , ويبدأ الدكتور يقطع كيس الفتق ويخرجه , وبعدين يبدأ الدكتور يقفل الجرح تاني بعمليه بسيطه بيختفي أثارها بعد فترة بسيطه جداً من العملية , لدرجه أنك لما تيجي تبص علي مكان الجرح مش بتلاقي ليه أي أثر نهائي .
ولو الفتق حجمه كبير نعمل أي ؟؟
برضو هنسيب الطفل 3 أو 4 سنين لأنه ممكن برضو يقفل لوحده , وحتي لو جدار البطن مقفلش , علي الأقل حجم الفتق هيكون صغر جداً , وفي الحاله دي بنعمل عمليه تجميليه بسيطه جداً .
في بقي شوية معلومات مهمه جداً لازم ناخد بالنا منها :
-
ممنوع نستخدم حزام السره أو العمله المعدنيه علي الفتق السري خالص , طب ليه ؟؟
لأن في بعض الحالات لما بيتم إستخدام عمله معدنيه وتفضل موجوده لفتره معينة من الوقت , ممكن جداً يحصل تأكل في الجلد أو قرحه في الجلد , والجلد بتاع البطن يفتح خالص , ونبص نلاقي أمعاء الطفل خارج بطنه تماماً .
-
الفتق السري مش سبب لمغص الطفل , يعني لما الطفل يكون عنده مغص أو إنتفاخات ف دا مش بسبب الفتق السري خالص .
نستقبل آراءكم بكل اهتمام
التعليقات (1)
bottom of page
ابني كان عنده فتق سري وهو وكمان محتاج طهاره وكنت قلقانه جدا اني اخد الخطوه وكمان اني القي جراح اطفال ممتاز والحمدلله ربنا دلني علي دكتور عبدالعزيز و حجزنا وروحنا العياده طمني جدا من اني اخد الخطوه ونعمل العمليه والحمدلله ابني من تاني يوم وهو بصحه كويسه🥰 ولو كان في اي استفسار ببعت اسال الدكتور وكان متعاون جدا والرد بسرعه فشكرا لحضرتك جدا يادكتور عبدالعزيز جزيت عنا كل خير وارشح حضرتك لاي حد محتاج جراح ممتاز زي حضرتك متابعه واستقبال وكل حاجه كانت ممتازه الحمدلله ..فعلا حضرتك جراح برتبة اب