ختان - طهارة الأطفال
خليني بس الأول أقولك الف الف مليون مبروك علي المولود الجديد ويتربي في عزك يارب , ويطلع راجل أد الدنيا كدا ويشرفك
الأول بس إنتوا فاهمين إيه معني كلمه طهاره , ولا هي حته جلده بتتشال وخلاص ...لا دا الموضوع مش كدا خالص
دا عمليه جراحيه بسيطه جداً علشان نشيل بيها الجلد الذايد اللي بيغطي نهايه العضو .
, أيوه يعني ما إحنا بنشيل حته جلد اهو وخلاص ....لا بس خلي بالك علي قد ما هي بسيطه علي قد ما هي صعبه,طب لي بقي ؟؟؟
لأن إحنا بنشيل الجلد الذايد ونحافظ كمان علي شكل العضو, اللي هو حاجه كدا زي عمليه تجميل فلاًزم تتعمل بحرص كبير جدا.
طيب هيجري اي يعني لو سبنا حته الجلد دي زي ما هي , او سبنا العضو زي ما هو (زي ما ربنا خلقه)؟؟
طبعاً مينفعش .
طب ليه ؟؟؟؟ في سببين :
السبب التاني :
وهو السبب العلمي اللي بيأكد صحة سنة النبي صلي الله عليه وسلم .
اكدت دراسات وابحاث كتير ان طهاره الطفل بتقلل خطر اصابته بسرطان القضيب , مش كدا وبس لا دي كمان بتقلل نسبه خطر اصابته بعدوي المسالك البوليه , وفيروس المناعه البشريه.
طيب يبقي دلوقتي عرفنا ليه لازم أعمل عملية الطهاره ..صح كدا ؟
اولا سبب ديني :
كل الاديان اوصت بطهاره الاولاد خصوصا الدين الإسلامي .
عَنْ أَبي هُريرةَ ، عَنِ النَّبِيِّ ﷺ قَالَ " الفِطرةُ خَمسٌ، أَوْ خمْسٌ مِنَ الفِطرةِ: الخِتان، وَالاسْتِحْدَادُ، وَتقلِيمُ الأَظفَارِ، ونَتف الإِبِطِ، وقَصُّ الشَّارِبِ " مُتفقٌ عَلَيْهِ .
يبقي طبعا لازم تتعمل , بقولك سنه اوصي بيها النبي .
طب ثواني بقي...
هو أمتي اصلا أعمل عملية الطهاره او اي أحسن وقت لطهاره الطفل؟؟
في الغالب الوقت دا بيكون بعد وقت قصير من الولاده , او خلال ال3 شهور الأولي من عمر الطفل.
يجي حد يسألني طيب لو فيه طفل عنده (سنه _ سنتين او حتي عشر سنين) مينفعش اطاهره ؟؟؟
لأ طبعا ينفع وهيتطاهر بس بيتم استخدام اجرائات تانيه علشان عمليه الطهاره (هنعرفها قدام).
طيب يبقي دلوقتي إحنا عرفنا إي هي الطهاره , وإي فايدتها وكمان إمتي اعملها.. صح كدا.
طيب هو فيه حاجات تمنع او تأجل عملية الطهاره؟؟؟
أه طبعا ولازم نركز فيها كمان .
تعالوا بقي نعرف اي هي مؤجلات طهارة الأطفال ....
5
إن الطفل ممكن يكون مصاب بالفتق الإربي أو ممكن يكون مصاب بالخصية المعلقه .
ف ممكن الدكتور يطلب تأجيل العملية من 3 ل 6 شهور لحد ما نحل المشاكل دي الأول .
4
إن الطفل يبقي مولود عنده مشاكل في الدم زي سيوله في الدم ,ف ممكن يحصل نزيف أثناء العملية , او الطفل عنده مشاكل في القلب , فلازم العملية تتأجل لحد ما نحل المشاكل دي الأول .
3
إن العضو الذكري بتاع الطفل يبقي مدفون , او مش باين وظاهر بشكله الطبيعي , ف ممكن تتأجل عملية الطهاره ل 6 شهور أو يمكن أكتر , ودي بترجع لرؤية وتشخيص الدكتور علشان بعد كدا تحصل عملية الطهاره بشكل أمن.
2
يبقي فيه إلتصاق بين جلد العضو الذكري عند الطفل والخصيه, يعني العضو الذكري بتاع الطفل يبقي لازق في الخصيه , ف مقدرش أعمل عمليه الطهاره في الوقت دا , لإن الطفل ممكن يبقي محتاج عملية تصليح علشان نفك الإلتصاق دا.
1
إن الطفل يبقي مصاب بمرض الإحليل السفلي .
طب إي هو أصلا الإحليل السفلي دا, ( هو إن فتحة البول مش بتبقي في مكانها الطبيعي في نهايه العضو ), فلازم نأجل عملية الطهاره لإن احنا اصلا بنستخدم جزء من الجلد اللي بيخرج من عملية الطهاره في اصلاح الإحليل السفلي
بس خلي بالك بقي , إحنا رايحين نطاهر إبننا يعني نشيل شوية الجلد الذياده,مش رايحين نقطع من الجلد على قد ما نقدر , أو نعمل للطفل نزيف أو نعمل تشوه للعضو الذكري , أو غرغرينة (ودي تبقي كارثه)
طيب هو دا ممكن يحصل ؟؟؟
طبعا وتعالوا بقي أقولكم ازاي :
السبب التاني :
إن الدكتور ممكن يكون بيستخدم أله غير أمنه للطفل علشان عملية الطهاره...طيب زي إي ؟؟
*مقص العضم أو ( bone cutting ) ودي أله خطيره جدا جدا , وقليل جداً من الأطباء اللي بيجيدوا إستخدامها , لإن ممكن يحصل نزيف كبير للطفل , او يحصل قطع جلد ذياده للطفل فيحصل مشاكل كبيره بعد كدا .
*إستخدام جهاز الدياثرمي (او جهاز احادي القطب), ودا جهاز مش أمن بشكل كبير , لإنه ممكن يسبب حرق للطفل في العضو بتاعه , ودا ممكن يؤدي لغرغرينا في العضو ومشاكل تانيه إحنا في غناا عنها خالص .
السبب الاول :
معظم الناس لسا بتعتمد علي الطرق بتاع زمان , اللي هي إني أخد ابني عند ممرضة في المنطقه عندنا , أو اي حد متمرس وطبعاً دا غلط كبير جداً , لإنك بتعرض طفلك لخطر كبير طيب اي الصح ؟؟؟
الصح إن لازم اروح بطفلي لجراح أطفال متخصص في جراحه الطهاره , لإنه شخص فاهم ودارس كويس جدا هو بيعمل إي , لإن دي مش مجرد عملية جراحيه وبس ...لأ دي عمليتين في قلب بعض , عملية جراحيه وعمليه تجميليه ( خد بالك ليها تأثير كبير في ثقه إبنك في نفسه لما يكبر )
طيب تعالوا بقي نعرف اي هي أنواع عمليات الطهاره , واي أحسن وأمن طريقه فيهم لطهاره الطفل :
الأول بس خلينا نعرف نقطه مهمه جدا وهي :
البنج أو طريقة تخدير الطفل : لو الطفل عمره أقل من 4 شهور , بيتم إستخدام بنج موضعي علي العضو الذكري للطفل قبل بدايه العملية .
طيب لو الطفل بقي أكبر من 4 شهور فيما فوق ( سنه او اتنين او حتي عشر سنين ), لازم يتم إستخدام بنج كلي قبل العملية, لإن الطفل في الوقت دا بيبقي عنده وعي شبه كامل بأعضائه الجنسيه , والبنج الموضعي مش هيأثر فيه بشكل كبير , وكمان ممكن يحصل ليه حاله نفسيه , ويبقي عنده رهبه او خوف من اي دكتور بعد كدا , فلازم يتم إستخدام بنج كلي والعملية تتم في مستشفي مجهزه بكل الأدوات اللازمة.
نرجع بقي لطرق عملية الطهاره , وإي هي أفضل وأحسن وأمن طريقة لعمليه الطهاره :
*مقص العضم (bone cutting ) ودا إحنا قلنا قبل كدا إن دي أله خطيره جدا وغير أمنه , ولازم اللي يستخدمها يكون دكتور متمكن جداً .
*الختان بالكي الحراري : ودي برضو إتكلمنا عليها قبل كدا وقلنا انها مش طريقه امنه , لأنها ممكن تحرق العضو بتاع الطفل.
*الختان أو الطهاره بالحلقه البلاستيكيه : ودي طريقه كويسه لكن مش مفضله , لإن ممكن يحصل إزاله جلد ذياده .
*الختان بالجومكو : وهي دي أفضل وأحسن وأمن طريقه لعمليه الطهاره , لأنها بتضمن شكل تجميلي جداً للعضو, وكمان الجلد بيكون متساوي جداً , وبتضمن عدم تعرض الطفل لأي نزيف .
طيب حد يسألني ويقولي هي العملية دي بتاخد وقت كبير علشان تخلص؟؟
أقولك غالباً لا مده العملية بتكون بين ال10 ل 15 دقيقة .
طيب اي هو بقي دورك كأب او دورك كأم في رعايه طفلك بعد العملية :
أولا دي إسمها عملية جراحيه , مهماً كانت بسيطه ف برضو إسمها عمليه جراحيه , ف طبيعي إن الطفل بعد العملية ممكن يحس بوجع بسيط جداً في العضو بتاعه , فأكيد الدكتور بيكتب للطفل نوع مسكن ( سيتال كل 4 ساعات او كل 6 ساعات علي حسب رؤية الدكتور ) ومرهم , ف ضروريٍ جداً ياخد العلاج في معاده , طبيعي كمان بيبقي فيه ورم بسيط مكان العمليه ودا بيختفي بعد أسبوعين او بالكتير ثلاث أسابيع من العملية , او بنلاحظ وجود قشره بسيطه مكان الجرح , ودي مفيش منها اي قلق لأنها بتقع لوحدها بعد كدا , كمان كمان الدكتور بينصح الأم أنها تبعد الطفل عن الإستحمام لمده 3 او 4 أيام من بعد العملية , ولو الطفل عمل حمام بول بيتم تنظيف العضو بالمناديل المبلله , وبيتم بعدها متابعه مع الدكتور بعد 5 إلي 7 أيام من العملية .
أتمني أكون قدرت أجاوب بشكل كافي وبسيط علي كل الأسئلة اللي بتدور في دماغكم , وأتمني ربنا يشفي كل أطفالنا يارب ويقومهم بألف خير وسلامة , ونشوفهم بيكبروا قدام عنينا ويبقوا أحسن الناس .
